11 ਵਰ੍ਹੇ ਦੀ ਸ਼ਰਧਾ ਕਰ ਰਹੀ ਹੈ ਕਾਨਪੁਰ ਤੋਂ ਵਾਰਾਨਸੀ ਤਕ 570 ਕਿਲੋਮੀਟਰ ਦੀ ਤੈਰਾਕੀ; ਟੀਚਾ ਉਲੰਪਿਕ ਖੇਡਾਂ 'ਚ ਮੈਡਲ
ਸ਼ਰਧਾ ਸ਼ੁਕਲਾ 11 ਵਰ੍ਹੇ ਦੀ ਹੈ. ਤੈਰਾਕੀ ਦਾ ਸ਼ੌਕ਼ ਹੈ ਪਰ ਇਸ ਤੋਂ ਅਗ੍ਹਾਂ ਜਾ ਕੇ ਉਸਨੇ ਉਲੰਪਿਕ ਖੇਡਾਂ ਵਿੱਚ ਤੈਰਾਕੀ ਮੁਕਾਬਲਿਆਂ ‘ਚ ਭਾਰਤ ਦਾ ਨਾਂਅ ਰੋਸ਼ਨ ਕਰਨ ਦਾ ਟੀਚਾ ਮਿਥ ਲਿਆ ਹੈ. ਇਸ ਟੀਚੇ ਨੂੰ ਪ੍ਰਾਪਤ ਕਰਨ ਲਈ ਉਸਨੇ ਹਾਲੇ ਤੋਂ ਹੀ ਤਿਆਰੀ ਸ਼ੁਰੂ ਕਰ ਦਿੱਤੀ ਹੈ.
ਉਹ ਹੁਣ ਕਾਨਪੁਰ ਤੋਂ ਲੈ ਕੇ ਵਾਰਾਨਸੀ ਤਕ ਤੈਰਾਕੀ ਕਰਦੀ ਹੋਈ ਜਾ ਰਹੀ ਹੈ. ਇਹ ਵੀ ਇੱਕ ਨਵਾਂ ਕੌਮੀ ਰਿਕਾਰਡ ਹੋਵੇਗਾ. ਨਾਂਹ ਸਿਰਫ ਆਪਣੇ ਲਈ ਸਗੋਂ ਦੇਸ਼ ਲਈ ਵੀ ਉਹ ‘ਗੰਗਾ ਸਫਾਈ’ ਮੁਹਿੰਮ ਦਾ ਸੰਦੇਸ਼ ਦੇ ਰਹੀ ਹੈ.
ਸ਼ਰਧਾ ਨੇ ਦਸ ਦਿਨਾਂ ਤਕ ਚੱਲਣ ਵਾਲੇ ਤੈਰਾਕੀ ਮਿਸ਼ਨ ਦੀ ਸ਼ੁਰੁਆਤ ਕੌਮੀ ਖੇਡ ਦਿਹਾੜੇ ਤੋਂ ਹੀ ਕੀਤੀ ਹੈ. ਉਹ ਕਾਨਪੁਰ ਤੋਂ ਵਾਰਾਨਸੀ ਤਕ 570 ਕਿਲੋਮੀਟਰ ਦੀ ਦੂਰੀ ਤੈਰਾਕੀ ਕਰਕੇ ਪੂਰੀ ਕਰੇਗੀ. ਇਹ ਦੂਰੀ ਉਲੰਪਿਕ ਦੇ 13 ਮੈਰਾਥਨ ਦੌੜਾਂ ਜਿੰਨੀ ਹੈ. ਇਸ ਦੂਰੀ ਨੂੰ ਮਿੱਥੇ ਸਮੇਂ ਵਿੱਚ ਪੂਰਾ ਕਰਨ ਲਈ ਸ਼ਰਧਾ ਨੂੰ ਹਰ ਰੋਜ਼ 60 ਕਿਲੋਮੀਟਰ ਤੈਰਾਕੀ ਕਰਨੀ ਪੈਣੀ ਹੈ. ਉਹ ਹਰ ਪੰਜ ਘੰਟੇ ਲਗਾਤਾਰ ਤੈਰਾਕੀ ਕਰਕੇ ਕੁਝ ਚਿਰ ਲਈ ਆਰਾਮ ਕਰ ਸਕਦੀ ਹੈ.
ਉਹ ਕਹਿੰਦੀ ਹੈ ਕੇ ਮੈਨੂੰ ਘਬਰਾਹਟ ਨਹੀਂ ਸਗੋਂ ਚਾਅ ਚੜ੍ਹਿਆ ਹੋਇਆ ਹੈ. ਮੈਂ ਕੌਮੀ ਰਿਕਾਰਡ ਬਣਾਉਣਾ ਹੈ. ਇਸ ਤੋਂ ਬਾਅਦ ਮੈਂ ਉਲੰਪਿਕ ਖੇਡਾਂ ਵਿੱਚ ਜਾਣਾ ਹੈ ਅਤੇ ਇੰਗਲਿਸ਼ ਚੈਨਲ ਪਰ ਕਰਨਾ ਹੈ.
ਸ਼ਰਧਾ ਨੇ ਤੈਰਾਕੀ ਮਾਤਰ ਦੋ ਵਰ੍ਹੇ ਦੀ ਉਮਰ ਵਿੱਚ ਸ਼ੁਰੂ ਕਰ ਦਿੱਤੀ ਸੀ. ਉਸਦੇ ਦਾਦਾ ਜੀ ਗੋਤਾਖੋਰ ਸਨ. ਉਹ ਉਸਨੂੰ ਆਪਣੇ ਨਾਲ ਗੰਗਾ ‘ਤੇ ਲੈ ਜਾਂਦੇ ਸਨ. ਜਦੋਂ ਉਹ ਮਾਤਰ 9 ਵਰ੍ਹੇ ਦੀ ਸੀ ਤੇ ਉਸਨੇ ਕਾਨਪੁਰ ਤੋਂ ਅਲਾਹਬਾਦ ਦੀ ਦੂਰੀ ਗੰਗਾ ਵਿੱਚ ਤੈਰ ਕੇ ਪਾਰ ਕਰ ਲਈ ਸੀ. ਉਹ ਆਪਣੇ ਦੋਸਤਾਂ ਵਿੱਚ ‘ਜਲਪਰੀ’ ਦੇ ਤੌਰ ‘ਤੇ ਜਾਣੀ ਜਾਂਦੀ ਹੈ.
ਹੁਣ ਉਸਨੇ ਬਹੁਤ ਵੱਡਾ ਟੀਚਾ ਮਿਥ ਲਿਆ ਹੈ. ਉਸਦੇ ਨਾਲ 8 ਗੋਤਾਖੋਰ ਨਾਲ ਚਲ ਰਹੇ ਹਨ. ਕਿਸੇ ਇਮਰਜੇੰਸੀ ਨਾਲ ਨਜਿਠਣ ਲਈ ਇੱਕ ਡਾਕਟਰ ਵੀ ਨਾਲ ਨਾਲ ਹੈ. ਉਸਦੇ ਪਿਤਾ ਲਲਿਤ ਸ਼ੁਕਲਾ ਨੇ ਦੱਸਿਆ ਕੇ ਇਸ ਵੇਲੇ ਗੰਗਾ ਦਰਿਆ ਚੜ੍ਹਿਆ ਹੋਇਆ ਹੈ ਅਤੇ ਇਸ ਕਰਕੇ ਉਹ ਖਤਰਾ ਨਹੀਂ ਚੁੱਕ ਸਕਦੇ. ਇਸ ਲਈ ਗੋਤਾਖੋਰ ਨਾਲ ਹਨ.
ਲੇਖਕ: ਥਿੰਕ ਚੇੰਜ ਇੰਡੀਆ
ਅਨੁਵਾਦ” ਰਵੀ ਸ਼ਰਮਾ
